Yol polisi “Keşlə dairəsi”ni fırlanır - VİDEO

Baş Dövlət Yol Polisi İdarəsi paytaxtın Nərimanov rayonu “Keşlə dairəsi” kimi tanınan ərazidə yol polisi ilə bağlı yayılan videonu araşdırmağa başlayıb.

AutoCity.az xəbər verir ki, Bakı şəhər BPİ Mətbuat Xidmətinin rəisi, polis mayoru Elşad Hacıyev sosial şəbəkələrdə yayılan videogörüntülərdən məlumatlı olduqlarını bildirib.

“Orada yol polisinin hər hansı avtomobili saxlaması müşahidə olunmur, dislokasiya üzrə xidmət aparır. Buna baxmayaraq, Bakı şəhər BPİ Dövlət Yol İdarəsində videogörüntülərdə iddia olunan hallarla bağlı müvafiq araşdırma aparılır” deyə Hacıyev vurğulayıb.

Sözügedən videonu çəkən şəxs isə iddia edir ki, dairəni təkrarən bir neçə dəfə dönən yol polisi bilərəkdən sürücüləri xəta törətməyə məcbur edir.

Xatırladaq ki, eyni vəziyyət bir müddət əvvəl Sədərək ticarət mərkəzinin yaxınlığındakı dairədə də baş vermişdi. Bu halla bağlı BDYPİ-nin mətbuat xidmətinin rəhbəri K. Əliyev bildirmişdi ki, yol polisi sürücülərə “tələ” qurmur: “7 dəfə dönmə nəticəsində yalnız bir avtomobil saxlanılıb”.

RƏY BİLDİRİN